За 12,5 отсто е зголемена вкупната потрошувачка на природен гас минатата година, во споредба со 2019 година. Вкупно 471 потрошувачи, од кои 340 се домаќинства, потрошиле над 338 милиони нормални метри кубни гас. Во 2020 година има 53 нови приклучоци од категоријата домаќинства, во споредба со 2019, кога се регистрирани само 14 нови приклучоци, покажуваат анализите на Регулаторната комисија за енергетика и водни услуги (РКЕ).

Како што посочи на прес-конференција претседателот на РКЕ, Марко Бислимовски, гасната електрана-топлана Те-То АД Скопје останува доминантен потрошувач на природен гас со околу 68 отсто од вкупната годишна потрошувачка на државно ниво. Втор на листата по потрошени нормални метри кубни е „Производство на топлина Балкан Енерџи“ Дооел, по што следуваат „Макстил“ и ЕСМ „Подружница Енергетика“.

„Од година во година расте потрошувачката на природниот гас, што е показател дека гасот е економски најдобар енергенс, но и еколошки најдобар. Нетипични се бројките во енергетскиот сектор во годината на пандемијата со ковид-19, кога станува збор за  оваа потрошувачка. Податоците покажуваат зголемена потрошувачка на природен гас кај општата индустрија и тоа за 43 отсто, од друга страна пак, за скоро 11 отсто е намалена потрошувачката кај металната индустрија, помала потрошувачка лани има и кај технолошко индустриско развојните зони и тоа за 16 отсто. Зголемено трошење има кај болниците, приближно за 8 отсто, а исто така зголемување има и кај производството на термоелектраните, додека стабилна останува потрошувачката кај јавните институции и прехрамбената индустрија“, рече Бислимовски.

Тој објасни и дека ЈП „Струмица гас“, преку својот т.н виртуелен систем, лани дистрибуирало над 709.100 nm3 гас, што е за 5 отсто повеќе од 2019 година. Раст со помал интензитет има и кај ЈП „Куманово гас“, кое минатата година регистрира испорачани скоро 541.000 нормални метри кубни гас.

Инаку, од јануари годинава, во сила е одлуката на РКЕ, со која е намалена тарифата за пренос на природен гас во просек за 6,16 отсто.