Во организација на Здружението на граѓани Нексус граѓански концепт и во соработка со одделението за образование, култура, спорт и млади од Општина Сарај и Хепи Шелтер, основците учеа како преку емпатија кон уличните кучиња ќе имаат емпатија и попозитивни ставови кон луѓето и своите врсници.
„Многу од децата беа зачудени дека вакво прифатилиште воопшто постои. Кога ги гледаа фотографиите во каква состојба биле згрижени кучиња и колку се излечени што дури веќе не се ни препознава дека се истите, учениците беа воодушевени и со неизмерна радост и љубов играа со нив. Многу од нив споделија и нивни искуства за грижата за бездомните животни. Ни кажаа, дека и тие се обидуваат да помогнат кога некој ги клоца и малтретира и дека често собираат храна за да им дадат. Но, за жал кажаа дека има и возрасни соседи кои ги спречуваат во ваквите хумани намери“, изјави Афродита Муслиу од Нексус граѓански концепт за Мета.
Многу од учениците, како што кажаа организаторите, изразиле желба повторно да дојдат и да се грижат за спасените кучиња.
Според Муслиу со ваквите акции преку развивање на емпатијата кон животните се намалува и на насилството врз врсниците во училиштата.
„Преку грижата за животните, децата стекнуваат самодоверба и стануваат одговорни личности во општеството. Генерално, кај децата се подобрува менталната и психосоцијалната состојба, а тоа ги прави поотпорни кон одредени негативни влијанија “ рече Муслиу.
Денешниот едукативен ден за децата од Сарај е дел од проектот „Патот кон отпорност и реинтеграција на ранливите семејства во заедницата“, спроведуван од конзорциумот на организации Македонски центар за меѓународна соработка – МЦМС, Нексус граѓански концепт, Иницијатива за европска перспектива – ИЕП, Хоризонт Цивитас, и ПЛЕИАДЕС организација. Проектот e со поддршка од Глобалниот фонд за ангажман и отпорност на заедницата (Global Community Engagement and Resilience Fund – GCERF).