Усвојувањето на ценовникот за јавен превоз во Тетово денеска беше проследено со реакции на студентите и студентските организации, бидејќи цените за студентите се поскапи од оние за општинските административци, а не беа прифатени предлозите на советниците за движење БЕСА и Алијанса за Албанците за олеснувања за студентите. Директорот на ЈП „Тетово Транспорт“ ја остави отворена можноста за промени во иднина, пишува Порталб.мк.
Месечниот билет за користење на јавен превоз во Тетово за студенти е 600 денари, а за општинската администрација 450 денари. Исто така, годишниот билет за студенти е 6.000 денари, а за вработените во општините 4.500 денари.
Овој факт го револтира активистот и студент Дон Муртезани, кој за Порталб.мк. рече дека со последната одлука на Општинскиот совет е оштетен највиталниот слој на општеството, студентите, и побара итна промена на оваа веќе усвоена одлука.
„Многу граѓани се погодени од одлуките на општинскиот совет, овојпат е оштетен највиталниот слој на општеството, а тоа се младите. Низ целиот свет се работи студентите да имаат олеснувања, а ние ги оштетуваме. Јас би предложил сите студенти да направат фронт пред општината против оваа одлука што воопшто не е разумна, мислам дека треба да има олеснувања, евентуално за студентите да биде бесплатни со лична карта или да биде најмалку 200 денари годишно. Ако ги споредиме со општинската администрација, тие добиваат плати додека голем број од нив дури и не одат на работа. Зошто треба да ги имаат овие бенефиции додека студентите имаат многу трошоци, а нималку олеснувања“, рече Муртезани.
Од друга страна, Зелиха Мустафа од Албанскиот студентски сојуз (АСС) истакна дека студентите не создаваат приход како вработените во општината, па според оваа организација придобивките на административците се скандалозни.
„Ова е тотално неприфатлива цена за нас од АСС, и бараме цената итно да се коригира и да биде прифатлива нашиот џеб знаејќи дека ние како студенти не создаваме приход и дека месечниот студентски буџет е ограничен и да не кажам со однапред планирани неопходни трошоци. Во оваа ситуација, ние од АСС, треба да го кренеме гласот и никако не смееме да го дозволиме овој ценовник,“ рече Мустафа.
Гласањето на ценовникот за јавен превоз во Тетово беше втора точка на седницата што денеска ја одржа Советот на општината во Тетово, а советникот од Движење БЕСА, Бесар Дурмиши, предложи да има дополнителни олеснувања за студентите и да се додаде уште една категорија, за социјални случаи.
„Тоа е нерамнотежа на цените бидејќи групата што има приход има поевтина цена од студентите кои воопшто немаат приход. Значи, за студентите на кои треба да им помогнеме има повисока цена, а една група, односно социјални случаи воопшто немаат приход, не беа земени во предвид“, рече Бесар Дурмиши, од Движењето БЕСА.
Истите барања ги постави и советникот од Алијансата за Албанците (АА), Ариф Селами, и според него, нема смисла студентите да плаќаат повеќе од општинската администрација.
„Нема смисла вработените во Општина Тетово да плаќаат помалку од студентите кои не се вработени. За студентите мора да има поевтини цени од вработените во општина
Тетово“, додаде Селами.
Од друга страна, директорот на ЈП „Тетово Транспорт“, Фејсал Беадини ја остави
отворена можноста цените на билетите за јавниот превоз да се променат во иднина.
„Секако дека ќе го отвориме ова прашање на следниот состанок на Управниот одбор, вие знаете дека во компанијата не е само директорот орган на управување, всушност директорот ги извршува одлуките донесени во компанијата. Секако, за тоа ќе се разговара со првиот човек на Општина Тетово, кому компанијата е должна да му даде финансиски извештај и извештај за работата, на следните седници веројатно ќе има измени“, рече Беадини.
На прашањето на Порталб.мк зошто беше потребно вработените во општината да имаат намалување на цените, тој истакна дека тие се во групата што ќе треба да користи јавен превоз повеќе од сите други и да не одат на работа со автомобил.
„Заедно со другите тела на компанијата разговаравме и се согласивме дека ова треба да се земе во некоја форма како позитивна дискриминација затоа што тие се оние кои треба да го користат јавниот превоз најмногу како поттик за нив да одат на работа користејќи јавен превоз, а не со автомобил“, додаде Беадини.
Во меѓувреме, покрај одлуката за цените на билетите на компанијата, денес на оваа компанија и беа дадени во сопственост пет нови автобуси, кои се очекува да бидат пуштени во употреба кон средината на март.
Кои ќе бидат линиите по кои ќе поминуваат овие автобуси?
Првично, Јавното претпријатие „Тетово Транспорт“ е планирано да сообраќа во три линии кои го покриваат поголемиот дел од градот Тетово, и тоа:
• Првата линија – е од автобуската станица на улица Борис Кидриќ до универзитетот во Југоисточна Европа.
• Втората линија – поминува по улиците Борис Кидриќ, Иво Лола Рибар, Страшо Пинџур, Т.Ц. Мерџан, Илинденска, во близина на Универзитетот на ЈИЕУ, Љуботен, Киро Ристоски Дрнц, улиците Ѓорче Петров, Браќа Миладинови, булеварот Видое Смилевски Бато, 29 Ноември, Благоја Тоска, Маршали Тито, булеварот Видое Смилевски – Бато и завршува на Борис Кидриќ.
• Третата линија – на улиците Борис Кидриќ, булевар Видое Смилевски Бато, Маршал Тито, Благоја Тоска, 29 Ноември, Булевар Видое Смилевски Бато, Браќа Миладинов, Gjорче Петров, Киро Ристоски Дрнц, Љуботен, Илинденска, низ Илинденска до т.ц. Мерјан, улица Страшо Пинџур, Иво Лола Рибар, Благоја Тоска и завршува кај автобуската станица на улицата Борис Кидриќ.
Градоначалничката на Тетово има уште 8 месеци мандат, а заемот за автобусите ќе се отплаќа 13 години.
