Општина Чаир започна со изградба на водоводната и канализационата мрежа во населбата Серава. Од ова општина за „Порталб.мк“ рекоа дека во моментов се одвиваат работи во две улици, а се обезбедени средства и за другите улици.
„Ве известуваме дека процесот на регулирање на водоводната и канализационата мрежа во населбата Серава веќе е започната и во моментов работите се одвиваат во улиците Места и 138. За останатиот дел од улиците во овој ред, веќе се обезбедени потребните средства од буџетот на државата и како што е ветено работата ќе продолжи во континуитет сé до целосното финализирање на ветениот проект“, рекоа од Општина Чаир.
„Порталб.мк“ претходно на неколку наврати известуваше дека недостигот од канализација им предизвикува големи проблеми на граѓаните, особено при големи врнежи, при што многу пати настануваат поплави по улиците и домовите на граѓаните.
Граѓаните во вторникот за „Порталб.мк“ изјавија дека речиси секој пат кога врне, тие се соочуваат со истите проблеми, улиците се поплавени а како последица од недостигот на атмосферска канализација, водата ги поплавува и домовите на жителите, предизвикувајќи им значителни штети.
„Дождовите се страшни за нас како жители на населбата Серава, бидејќи улиците се преполнуваат со вода, се претвораат во реки бидејќи канализацијата не е регулирана. Ова претставува пречка за нас како жители на оваа населба, бидејќи често се случува како последица од водата да ни се оштетат и домовите па така сме принудени со наши домашни средства да ја отстраниме водата. Ова е штетно и за нашето здравје и за здравјето на нашите деца“, рече една жителка на Серава.
Жителите на оваа населба рекоа дека се чувствуваат запоставени и заборавени и рекоа дека се изморени од неостварените ветувања.
„За нас како жители во населбата Серава, секој дожд се претвора во ужас. Од причина што сега веќе подолго време сме заборавени, единственото нешто што ни преостанува е да се молиме врнежите да не траат многу бидејќи штетата што се нанесува во нашите домови е навистина голема. Изморени сме од ветувањата на општинските власти дека ќе изнајдат решение за проблемот со канализацијата, меѓутоа деновите поминуваат а решение сè уште нема“, рече еден друг жител.
На почетокот од мандатот, градоначалникот на општина Чаир, Висар Ганиу, вети дека ќе реализира многу проекти во оваа општина, меѓу другото, рече дека ќе ја изгради и атмосферската канализација во населбата Серава, која има најмногу проблеми со поплавите.
