Значаен број на книги од два проекти, едниот на Министерството за образование и наука и другиот од Министерството за култура и понатаму „скапуваат“ во магацините на овие институции, голем дел од нив во Гостивар. Од МОН информираат дека дел од книгите се дистрибуирани во различни институции, но не сите и ова се оправдува со фактот дека станува збор за голем проект, пишува Порталб.мк.
Поминаа две години откако Порталб.мк откри дека илјадници книги од проектот „Превод на 1.050 стручни и научни наслови од странски автори“ се наоѓаат во магацините на Министерството за образование и наука во Гостивар.
Говорејќи денес, од Министерството за образование и наука нагласуваат дека овие книги континуирано се дистрибуираат во државните институции, дека станува збор за книги од голема вредност преведени на албански и македонски јазик.
Книгите од проектот „Превод на 1.000 стручни и научни наслови од странски автори“ се книги кои се изучуваат во најдобро рангираните универзитети во САД и Англија, додека од областа на правото во Франција и Германија; проект кој подоцна беше дополнет со уште 50 книги, а истите првично беа складирани во магацин во Гостивар, потоа, со одлуки на Владата на РСМ, континуирано се дистрибуираа во министерства, универзитети, библиотеки, книжари итн.“, изјавија за Порталб.мк од Министерството за образование и наука.
Сепак, и покрај ова, голем број книги и понатаму се наоѓаат во магацините на Министерството за образование во Гостивар, а од ова министерство се оправдуваат со фактот дека станува збор за голем проект додека книгите се дистрибуираат со одлука на владата.
„Имајќи предвид дека се работи за голем проект, оваа постапка сè уште е во тек. Одлуките за дистрибуција на книги од страна на Владата беа донесени минатиот месец, односно во февруари, а во согласност со планот, некои книги (7.282 на македонски и 1.396 на албански јазик) се дистрибуирани во различни земји“, истакнаа од Министерството за образование и наука.
Инаку, книгите на капиталниот проект „Превод на 1.050 книги и научни наслови од престижни универзитети“, иако беа објавени во 2009 година, и понатаму остануваат во магацинот на Министерството за образование и наука во Гостивар, бидејќи се неупотребливи и покриени со прашина.
Во оптек има и книги кои се со лош превод и бројни грешки. Порталб.мк откри дека првично била планирана само една фаза за превод на 500 наслови, но како што минувале годините, бројот на наслови за превод се зголемувал.
Проектот, во текот на годините, беше преименуван и помина низ три фази. Според податоците дадени преку Законот за пристап до информации од јавен карактер, се дозна дека се објавени 770 наслови во тираж од по 1.000 примероци (770.000 книги), за што се потрошени најмалку 19 милиони евра. Проектот е развиен во периодот 2008 – 2017 година. За стотици други наслови нема податоци, не е познато што е објавено затоа што нема соодветна документација. Исто така, постои сомневање дека има бројни прекршувања на Законот за јавни набавки. Тендерите ги добија и компании кои се партиски донатори.
Од друга страна, илјадници други книги се во исти услови во магацините на Министерството за култура во Скопје. Од 770.000 книги во вредност од 9 милиони евра за пет капитални проекти на Министерството за култура, една од нив е проектот „Превод на 1.050 научни и стручни звања од светски признати универзитети“, рече поранешниот министер за култура, Асаф Адеми во својата прва конференција како министер на 5 јули 2017 година.
Податоците беа споменати и во извештајот на Државниот завод за ревизија, во кој исто така беше нагласено дека поради недостаток на простор во Министерството за култура за чување на предметните книги, биле користени подрумите на Музејот на современа уметност, Националната универзитетска библиотека и Археолошкиот музеј.
