Меѓународниот воз „Хелас експрес“ од Солун за Белград денеска за последен пат требаше да мине низ скопската железничка станица. Сепак, возовите за Солун и Белград од Скопје годинава воопшто не сообраќаа во летниот период. Поради тоа што корона кризата ги затвори границите со Грција и Србија, овој воз не отпатува ниту еднаш до својата крајната дестинација од почетокот на јуни до крајот на септември. На дневно ниво не сообраќа ниту брзиот воз меѓу Скопје и Приштина, така што оваа сезона железницата ќе прокнижи голема нула кај бројот на превезени патници во меѓународниот железнички сообраќај.
Од Железници на РСМ – Транспорт за „Мета.мк“ велат дека нашата железничка управа ги ставила своите човечки и технички ресурси на располагање за одржување на меѓународните возови. Здравствените услови со корона вирусот го направија главниот проблем, но од Железници потенцираат дека постои проблем и со техничките услови за сообраќање на возовите.
– Од страна на „Србија воз“ нѝ беше испратен допис во кој се вели дека немаат економска исплатливост на одржување на меѓународната линија. Заради тој факт, а имајќи предвид дека и состојбата со ковид-19 ги затвори границите за превоз на патници, оваа линија не се воспостави – се наведува во објаснувањето од Железници на РСМ – Транспорт.
Тие дополнуваат дека од Претпријатието за железничка инфраструктура на Србија добиле известување за почеток на реконструкцијата на пругата меѓу Ниш и Брестовац, што во наредниот период ќе доведе до целосен прекин на патничкиот железнички сообраќај.
Инаку, брзиот воз меѓу Скопје и Приштина сообраќаше само неколку дена во текот на март годинава, по што беше привремено укинат поради затворањето на границите меѓу нашата земја и Косово со појавата на ковид-19.
Македонија веќе неколку години наназад нема редовна железничка линија кон соседните Солун и Белград во текот на целата година, првенствено поради тврдењето на „Србија воз“ дека сообраќањето на овој експресен воз е неисплатливо.
И додека меѓу земјите од Балканот бројот на патници кај овој вид на транспорт постојано опаѓа, меѓународниот железнички превоз во земјите-членки на ЕУ станува сè попопуларен во изминативе години, со над 153,4 милиони патници превезени само во 2018 година.
