Полицијата им влезе во трага на сторителите што ноќеска запалија две возила во Битола. Неофицијално, потпалувачите на местото на настанот оставиле фантомка и хируршки ракавици.
За опожарувањето на возилата во вторникот во раните утрински часови, засега полицијата не коментира. Но, за денешниот случај, вели дека нема индиции дека имало политичка заднина.
– Во близина на местото на настанот пронајдени се материјални траги кои ќе бидат предмет на криминалистичко вештачење – вели Магдалена Димитровска, портпаролка на СВР Битола.
Во инцидентот ноќеска настрадаа вкупно четири возила, а предизвикана е материјална штета од еден милион денари.
Социјалдемократите од Битола денеска отворено обвинија дека и вториот инцидент со опожареното возило во Битола е со политичка заднина, затоа што е сопственост на активистка на СДСМ од Битола.
Потпретседателотот на СДСМ, Александар Кирацовски, вели дека никој нема да ги замолчи да ја обелоденат „Вистината за Македонија“.
– Предупредуваме дека неотрикавањето и неказнувањето на сторителите на овие два инцидента, отвора можност за свесно движење кон ескалација на штета на граѓаните на Македонија – рече Кирацовски.
Партијата на власт во Битола, пак, ја обвини СДСМ дека си игра, шпекулира и инсинуира во јавноста со приватни и со неразјаснети случаи на палење автомобили.
– Ова е Битола и тука живеат битолчани, космополити, а потоа членови на која било друга политичка партија. Ги повикуваме истражните органи да ги расветлат ваквите случаи – рече Благој Шаклевски, портпарол на ВМРО-ДПМНЕ во Битола.
А.Б.