Одделот за внатрешна контрола, криминалистички истраги и за професионални стандарди поднел кривична пријава против С.М. (51), полициски службеник од полициската станица во Радовиш, осомничен за примање поткуп, информира МВР.
Според полициските информации, кривичното дело за кое се сомничи, полицаецот го сторил ноќта меѓу 11 и 12 јануари оваа година, кога вршејќи контрола на булеварот Александар Македонски во Радовиш, заедно со свој колега, забележал паркирано комби, управувано од лице, за кое С.М. знаел дека го управува лице што немало положено возачки испит. Кога возилото се придвижило, полицајците го запреле, а Ј.М., кој го управувал комбито, ги замолил да не му пишуваат пријава. Полицајците го пуштиле и не го евидентирале прекршокот.
По кратко време осомничениот полицаец повторно отишол на местото каде претходно ја извршиле контролата, а кога се вратил во службеното возило, како што информираат од МВР, на својот колега му рекол дека „сега има за еден ручек“.
