Полициските службеници во текот на вчерашниот ден во Скопје продолжија со засилени контроли за санкционирање на непочитувањето на сообраќајните правила и прописи. Вчера на подрачјето на СВР Скопје изречени се 376 прекршоци по повеќе различни основи на возачи и пешаци од страна на полицијата, информираат од Министерството за внатрешни работи (МВР).
Меѓу напишаните казни, за возење без возачка дозвола санкционирани се 23 лица, изречени се 105 прекршоци за пречекорување на дозволената брзина на движење, додека 22 казни се за нерегистрирани и технички неисправни возила. Вчера биле санкционирани 35 мотоциклисти и биле одземени пет мотори. Пајак службата вчера подигнала 60 возила, а биле изречени и 57 мерки за непрописно паркирани возила. За неносење заштитни маски вчера биле изречени 100 санкции, се вели во соопштението на МВР.
Инаку, портпаролот на МВР Тони Ангеловски вчера информираше дека во наредниот период полицијата ќе спроведе засилени акциски контроли низ целата земја, при што ќе се санкционираат особено оние прекршоци што се причина за сообраќајни несреќи со тешки последици.
