Во рамките на заедничкиот проект за заштита на биодиверзитетот во езерата во Дримскиот Басен, поддржан од Германското друштво за меѓународна соработка ГИЗ, денеска и утре, во Поградец, Република Албанија, се одржува работен состанок за компонентата за заштита на важните видови флора и фауна во езерата.
Во рамките на проектот веќе е подготвена листа на важни видови и на овој состанок целта ќе биде да се утврдат пет до 10 најважни и најзагрозени видови во секое од езерата, врз кои потоа ќе се врши надзор во согласност со критериумите и со директивите на ЕУ и во согласност со капацитетите на институциите.
На состанокот преставници од Министерството за животна средина и просторно планирање дискутираат за законските рамки и за новата стратегија за биодиверзитет во Република Македонија, а претставници на невладиниот сектор ќе зборуваат за нивната вклученост во истражувањата и во надзорот врз видовите.
– Овој процес е исклучително важен за состојбата на важните и на ендемичните видови и во Охридското Езеро и во Преспанското Езеро како уникатни вредности и бара посветеност на надлежните институции и од македонска страна – вели Дејан Паноски од Билатерален секретаријат за сливотна Охридско Езеро.