Вработените во конфекциите во Штип, иако е неработен ден, по повод државниот празник 8 Декември – Денот на Св. Климент Охридски, денеска беа на своите работни места. Поради ова штипското здружение „Гласно“ организираше протест на кој симболично на транспаренти беа поставени работнички мантили.
Протестот, како што велат од здружението, е обид да се крене гласот против условите во кои работат конфекциските работнички. Во стотина конфекции во Штип на празник редовно се работи, а доколку не, тогаш се одработува во неделите, бидејќи сабота за нив е редовен работен ден.
Здружението „Гласно“ побара и измени во законот, со кои ќе се промени износот на минималната плата, која е најмала кај вработените во текстилно-кожарската индустрија.
– Минимална плата во текстилната и кожарската индустрија изнесува 9.000 денари, а во сите останати 10.080 денари. Бараме бришење на членот 2 од Законот за минимална плата, каде нормираниот учинок е подлога за злоупотреба на работниците од овие две гранки и на работодавецот му се дава право да исплаќа плата помала од минимално утврдената – рече Кристина Ампева од здружението „Гласно“.
Од здружението побараа и формирање на надворешен граѓански синдикат, кој ќе биде воден од работниците, а не како досега, тие да бидат претставувани од работодавците.
