По вчерашната владина одлука со која Јавното претпријатие за одржување и заштита на магистрални и регионалните патишта беше задолжено да ја урне дивоградбата кај „Мавровка“, денеска започнаа работите на терен за отстранување на бесправно изградениот објект. Екипи на ова јавно претпријатие со механизација го започнаа уривањето на бетонските столбови на дивоизградената карабина. На терен има и полициски службеници што ја обезбедуваат локацијата, на која се руши дивоградбата.
Инаку, Јавното претпријатие за одржување и заштита на магистралните и регионалните патишта ја ангажира потребната механизација, средства за работа и вработени не само за уривање, туку и за демонтирање на бесправно изградениот објект, и тоа без надоместок кон Оштина Чаир, односно уривањето го врши од сопствени средства.
Владата вчера им препорача на Општина Чаир и Јавното претпријатие за одржување и заштита на магистралните и регионалните патишта да ги регулираат меѓусебните права и обврски, така што ќе склучат договор за отстранување на бесправно изграден градежен објект, делови од објекти и бесправно поставени објекти.
„По исполнување на обврските од договорот, Општина Чаир и Јавно претпријатие за одржување и заштита на магистралните и регионалните патишта, во рок од 7 дена, се задолжени да подготват и до Владата на Република Северна Македонија да достават соодветна Информација за извршување на обврските од одлуката“, се вели во одлуката донесена на вчерашната владина седница.
Истовремено, МВР вчера поднесе кривична пријава до надлежното Јавно обвинителство против М.А. (34) заради постоење на основано сомневање дека пријавениот е сторител на кривично дело „бесправно градење“ по чл.244-а од КЗ на објект бесправно изграден на булевар Гоце Делчев, на платото пред ДТЦ Мавровка.
Рушењето на дивоградбата кај Мавровка следува откако Општина Чаир цело лето ветуваше дека ќе го урне бесправно изградениот објект, но ова не се случи поради тоа што не пронајдоа компанија заинтересирана да го спроведе рушењето. Општина Чаир беше задолжена за рушење, откако претходно општинските власти побараа од инвеститорот самиот да ја сруши дивоградбата, но сопственикот не го направи тоа.
Веднаш по започнувањето на постапката за рушење, сопственикот на дивоградбата Мевљудин Алити одржа прес – конференција за новинари, на која посочи дека објектот е легален и тој е спремен на оној кој сака да му го подари. Алити се повика на членот 76 од Законот за градење, каде се вели дека за обнова на објект не е потребно одобрение за градење.
Инвеститорот во објектот – дивоградба тврди дека во катастарот е впишан објект од 330 метри квадратни, како и дополнителни 86 метри квадратни. Алити изјави дека само го обновувал објектот што беше уништен во пожар, за што имал елаборат и самото кафуле било легализирано како деловен објект. Тој најавува дека правдата ќе ја бара на суд.
