Украинскиот претседател Володимир Зеленски во своето најново обраќање до нацијата изјави дека руските сили се обидуваат да ги уништат градовите во Донбас на истиот начин како што тоа го направија со пристанишниот град Мариупол, пренесува Гардијан.
„Лисичанск, Словјанск, Краматорск – тие целат било кој град да го претворат во Мариупол. Целосно уништен“, рече Зеленски.
Гардијан го пренесува и најновиот извештај на британското Министерство за одбрана, во кој се наведува дека руските сили напреднале повеќе од пет километри во правец кон Лисичанск, последниот поголем град под украинска контрола во Луганската област. Руските сили пристигнале кон јужните делови на Лисичанск, а украинските власти денеска потврдија дека уште две населени места во Луганската област потпаднале под руска окупација – Лоскутивка и Раи-Олександривка.
Сепак, украинските власти потврдуваат дека нивните војници продолжуваат да се борат против руските сили во Северодонецк, Суротуне и Золоте, јавува Укринформ.
Гувернерот на областа Днипропетровск, Валентин Резниченко ја обвини Русија дека ги користела забранетите касетни бомби при бомбардирањето на оваа област, пренесува Гардијан.
Тој обвини дека регионот Криви Рих бил бомбардиран шест пати изминатава ноќ, при што се уништени станови, а овој град од централниот дел на Украина е оставен делумно без струја и вода. Касетни бомби се расфрлани по улиците и дворовите, при што гувернерот Резниченко упати апел за огромно внимание од граѓаните.
Укринформ пак информира дека украинските безбедносни сили успеале да уништат две ракети истрелани од руската војска кон областа Одеса. Во изминатово деноноќие убиле најмалку 20 руски војници и уништиле воена опрема. Украина се обидува го поврати под своја контрола Змискиот остров во Црното море.
Во меѓувреме, руските сили повторно го гранатирале пристанишниот град Миколаив, кој се наоѓа во близина на окупираниот Херсон. Најмалку три напади врз овој регион биле извршени во изминатово деноноќие, при што еден цивил загинал, а тројца биле повредени.
