Австралиската писателка Колин Мекалоу, чиј екранизиран бестселер „Птиците умираат пеејќи“ стана една од најгледаните телевизиски мини-серии, починала на 77-годишна возраст, по низа здравствени проблеми, објавил нејзиниот издавач „Харпер Колинс“, јавуваат светските медиуми.
Мекалоу почнала да пишува по децении работа како успешен научник невролог во Австралија, Велика Британија и во САД, а нејзиниот роман, семејната драма „Птиците умираат пеејќи“, е продаден во 30 милиони примероци во светот.
Авторските права за романот биле продадени за тогаш рекордни 1,9 милион американски долари, a мини-серијата работена според романот им донесе голема популарност на актерот Ричард Чемберлен и на актерката Рејчел Ворд.
Серијата во времето кога се прикажувала, во 1983 година, станала втора по гледаност серија на сите времиња во САД, а освоила и четири награди „Златен глобус“ и шест награди „Еми“.
„Нејзиниот придонес за австралиската книжевност и читателите во светот е огромен. Таа е една од првите австралиски авторки кои успеале на глобално ниво. Многу ќе ни недостасува“, било наведено во соопштението на австралискиот „Харпер Колинс“.