Еден и пол месец по трагедијата во импровизираната дискотека „Пулс“ во Кочани во која загнаа 62 главно млади лица, и по средбата со семејствата на загинатите на денешниот протестен марш во Скопје, Јавното обвинителство објави отворен повик за информации, докази и лични сведоштва.
На веб-страницата на обвинителството (jorm.gov.mk) е поставен формулар кој како што соопштија од таму, граѓаните можат да го пополнат и да го испратат на електронската адреса [email protected].
„Врз основа на релевантноста на податоците, подносителите ќе бидат контактирани од страна на истражниот тим“, наведуваат од Обвинителството.
Претходно јавниот обвинител, Љупчо Коцевски и тимот на обвинители кои постапуваат во предметот за пожарот во кочанската дискотека „Пулс“ се сретнаа со дел од семејствата на жртвите. Како што велат тие ги информирале за текот на истражната постапка и идните чекори.
На средбата, обвинителите одговориле на сите прашања и дилеми на присутните роднини и, како што информираат од Обвинителството, ги увериле семејствата дека се води сеопфатна истрага која ги опфаќа сите можни аспекти на одговорност за трагичниот настан, во кој животот го загубија 62 лица.
„Семејствата бае запознаени и со претстојната фаза на распити на оштетените, кои ќе започнат во наредниот период“, велат од Обвинителството.
Обвинителството најави дека се интензивираат истражните дејствија, меѓу кои и вештачења чии прелиминарни резултати се очекуваат во следните неколку дена. Како што велат, во постапката се вклучени експерти од повеќе области и се користат сите расположливи капацитети на истражните органи.
