Падот на режимот на сирискиот претседател Башар ал-Асад се прославува на улиците низ многу градови на Европа и светот. Сиријците и денеска спасуваат преживеани од озлогласениот сириски затвор Седнаја, каде се откриваат луѓе чувани во подземни ќелии. Меѓу нив има на мајки со мали деца. Ослободувањето на затворениците се споделува преку видеа на Здружението на затвореници и исчезнати во затворот Седнаја (ADMSP) со седиште во Турција.
Во меѓувреме, Советот за безбедност на Обединетите нации најави дека во текот на денот ќе одржи итна седница на која ќе расправа за падот на режимот на претседателот Башар ал- Асад во Сирија. Состанокот бил побаран од Русија, за која се наведува дека им понудила азил на Асад и неговото семејство во Москва.
Асад вчера тајно го напушти Дамаск со авион и замина во непознат правец. Ројтерс објави изјави на двајца високи офицери на сириската армија, кои потврдија дека Асад се качил во авион на сириската авиокомпанија на аеродромот во Дамаск во неделата. Руските медиуми денеска објавуваат дека тој и неговото семејство добиле азил во Русија. Русија беше верен сојузник на Асад и претходно интервенираше во граѓанската војна во Сирија во обид да го задржи на власт.
