Во неделното интервју за „Радио Слободна Европа“, холандскиот амбасадор во земјава, Вилем Ваутер Пломп, вели дека часовникот отчукува до изборите во април следната година и дека е екстремно важно да се постигне договор за медиумите.
Амбасадорот Пломп порачува дека во врска со специјалната обвинителка, сите институции што се инволвирани треба да работат заедно и да ѝ овозможат да си ја врши својата работа.
– Назначен е специјален јавен обвинител и сега е екстремно важно таа да може да си ја врши својата работа и сите институции што се инволвирани да работат заедно и да ѝ овозможат да си ја врши својата работа. Во исто време, неколку прашања сè уште треба да бидат решени, а едно од најважните е поврзано со изборите следната година. Ќе има еден вид преодна влада, некои чекори се веќе преземени, некои сè уште треба да се преземат и екстремно важен дел е поврзан со медиумите, бидејќи слободни и независни медиуми, објективни медиуми, се многу значајни. И конечно, гарантираното право на глас е екстремно важен елемент. Кога дознав, при доаѓањето тука, дека според една анкета, 32 проценти од населението не мисли дека гласањето е целосно тајно во Македонија и дека овој процент се зголемил од претходните минатогодишни анкети, на кои бил 22 проценти, би рекол дека тоа е загрижувачки, затоа што, колку што јас знам, гласањето навистина е тајно во Македонија и многу е важно сите луѓе да можат да гласаат и да го искажат својот избор следната година – вели Пломп.
Според него, договорот околу медиумите треба да овозможи тие да ја одиграат својата улога во обезбедувањето факти и информации за граѓаните.
– Часовникот отчукува, ако може така да кажам, до 24 април следната година. Така што е особено важно е да се постигне договор за медиумите кој ќе се однесува и на изборите догодина и на долгорочни решенија што ќе гарантираат дека навистина медиумите ќе може да ја одиграат својата улога како што треба, во која било демократија. Повеќето демократии, ако не и сите, имаат одредени правила што гарантираат дека медиумите ќе може да ја одиграат суштинската улога во обезбедувањето факти и информации за граѓаните. На пример, многу е важно да има јасна дистинкција меѓу политичкото рекламирање и објективните новинарски извештаи од сите медиуми, без разлика дали се приватни или јавни медиуми – смета Пломп.
За холандскиот амбасадор, прислушувањата содржат многу сериозни обвиненија, кои треба да бидат утврдени и затоа е потребна истрага која е многу важна за да се утврдат и политичката и законската одговорност.
Тој истакна дека Холандија во изминативе десет години дала помош за Македонија во вредност од 200 милиони евра за повеќе програми и проекти, секогаш на барање на македонските граѓани.
– Ние сè уште продолжуваме да даваме помош за Македонија, на пример, за прашањата за човековите права, за медиумите, за демократската одговорност и ќе продолжиме со тоа. Ако ме прашувате дали сум задоволен со резултатите, во која било земја, техничката помош може да одигра одредена улога и тоа секогаш е процес на обиди и на грешки и мислам дека можеби најважен аспект е што луѓето продолжуваат да учат. Тоа се однесува на луѓето што даваат помош, но, исто така, се применува и врз институциите и врз луѓето кои работат со други институции. Да се стимулира ставот за учење, критичкиот став, па дури и партиципативен став, можеби е еден од најважните резултати кои може да се надеваме да ги постигнеме – истакна Пломп.
