123 граѓанки и граѓани денеска ја промовираа платформата за граѓанска политика „Ајде“. Членовите на „Ајде“, седнати на столчиња спроти Собранието, свртени кон споменикот на АСНОМ, симболично им порачаа на пратениците и на власта дека граѓаните се извор на суверенитетот и дека демократијата не е можна без активни, слободни и здружени луѓе. Платформата претставува неформална, но организирана група слободноумни поединци со ралични идеи и ставови, која сака да ги зајакне и здружи расцепканите демократски сили во земјата.
Мајран Забрчанец нагласи дека „Ајде“ има намера да ги поддржи граѓаните слободно да размислуваат, говорат, коментираат, креираат политики и слободно да бараат подобра власт.
Елизабета Секирарска смета дека мора многу да се зборува за образованието.
– Образованието е сериозно заболен организам, кој не може да се затскрие зад флоскулата „ова се опции за систематско подобрување на квалитетот на образованието“ – рече Секирарска.
Петрит Сарачини истакна дека на власт имаме мултиетничка коалиција, која ја крепи машинерија базирана на интереси, пари, непотизам, корупција, страв, насилство, сервилност, криминал, кражба на народни пари.
– Ајде да се сплотиме. Овој систем може да се победи само ако сме заедно, искрени и со меѓусебна почит – рече Сарачини.
