Министерството за внатрешни работи информира дека е лишен од слобода неготинец, кој украл возило и возејќи под дејство на алкохол и без возачка дозвола искршил рампи на наплатни станици на автопат во близина на Неготино. Полициските службеници го уапсиле М.Д.(26) од Неготино кој украл „ауди“ со битолски регистарски ознаки, сопственост на С.Д.(38), кое било паркирано во двор во Неготино.
Со возилото уапсениот скршил рампа на наплатна станица „Виничани“, во правец на Велес, а по кратко време повторно скршил рампа на наплатната станица „Виничани“, но во правец кон Неготино. Полицијата принудно го запрела дивеењето на неготинецот, за кого било констатирано и дека го управувал возилото пред да се стекне со возачка дозвола и со 1.54 промили алкохол во крвта. Тој бил задржан во полициска станица, известен бил јавен обвинител и по документирање на настаните против него ќе бидат поднесени поднесоци за прекршоци и кривични дела.
