Со денешното испраќање на новите летови за Осло и за Фридрихсхафен, компанијата што оперира со македонските аеродроми го прослави отворањето на петте нови рути од „Александар Велики“: Осло, Фридрихсхафен, Барселона, Нинберг и Хамбург.
– Петте нови дестинации со авиокомпанијата „Виз ер“ до Осло, Фридрихсхафен, Барселона, Хамбург и до Нинберг, се одлична можност за сите што сè уште не се одлучиле каде да го поминат одморот. Се разбира, очекуваме и доаѓање на туристи и на бизнисмени на овие линии, како и полесно и почесто доаѓање во татковината на нашите сограѓани што живеат во овие и во околните земји. „ТАВ Македонија“ е целосно посветена на пружање добра услуга на нашите патници – изјави Зоран Крстевски, генерален директор на „ТАВ Македонија“.
Тој додаде дека со отворањето на овие нови авиолинии, се очекува понатамошен пораст на сообраќајот и на бројот на патници на „Александар Велики“.
Петте нови линии до европските градови ќе ги има двапати неделно. За Фридрихсхафен и за Осло во понеделник и во петок, за Барселона во вторник и во сабота, додека за Хамбург и за Нинберг во среда и во недела.
Лани скопскиот аеродром „Александар Велики“ доживеа значајна пресвртница, достигнувајќи еден милион патници на годишно ниво, само во првите 10 месеци.
Минатата 2014 година „ТАВ Македонија“ опслужи речиси 1,3 милиони патници и притоа забележа пораст од 20 проценти на годишно ниво, на двата аеродроми – скопскиот „Александар Велики“ и охридскиот „Св. Апостол Павле“.
