Според најновите резултати објавени во 20.40 часот на веб-страницата на Државната изборна комисија (ДИК), покажуваат убедливо водство на Стево Пендаровски над Гордана Сиљановска – Давкова.
Од обработените 62,47 отсто гласачки ливчиња, јасно е дека кандидатот на владејачката коалиција, Стево Пендаровски, има околу 50.000 повеќе гласови од Сиљановска – Давкова, која беше поддржана од ВМРО-ДПМНЕ.
Од обработените гласачки ливчиња до 20.40 часот, Пендаровски има 54,44 отсто, односно 236.396 гласови, а Сиљановска – Давкова 42,08 отсто, односно 182.722 гласови.
Според мапата презентирана на веб-страницата на ДИК, Сиљановска – Давкова има водство според досега преброените гласови во голем дел од источна Македонија, освен во Крива Паланка, Делчево, Берово, Радовиш, Василево, Струмица и Дојран, а води и во Кавадарци, Прилеп, Могила…
Пендаровски има водство во западниот дел на земјава, освен во Охрид, Дебрца, Македонски Брод, Крушево.
Инаку и порпаролот на СДСМ, Костадин Костадинов на прес-конференција изјави дека од обработени над половина од резултатите, Пендаровски води со над 30.000 гласови.
– Првичните тенденции се задржаа на сигурно, стабилно водство на заедничкиот кандидат Стево Пендаровски. Очекуваме таквата тенденција да продолжи и Пендаровски да биде прогласен за претседател – рече Костадинов.
