Денеска кога ја одбележуваме борбата на жените за економска, политичка и социјална рамноправност, како и достигнувањата во повеќе сфери, да се потсетиме дека борбата за женските права е секојдневна и сѐ уште е борба за еднаквост и достоинствен живот, порача претседателот Стево Пендаровски по повод одбележувањето на Меѓународниот ден на жените.
„Покрај зголемената свест за правата на жените, донесените законски решенија и програми, на патот кон еднаквоста ни остануваат многу предизвици во однос на доследната имплементација на политиките, како и во поглед на образованието и промената на родовите стереотипи и норми“, наведено е во обраќањето на претседателот.
Во него, Пендаровски истакнува дека жените сѐ уште не се доволно застапени на политичките и економските позиции каде се носат клучните одлуки, а економската нееднаквост е јасно видлива и во бројни сектори каде жените се соочуваат со дискриминација и во поглед на платата и во поглед на пристапот и работните услови. Потребата од системско и доследно законско постапување на релевантните институции е клучно кон спречување и заштита од насилство врз жените.
Претседателот се осврна и на жените кои во конфликтите и мировните операции покажуваат дека можат еднакво да бидат во првите редови и одлучно да се борат за правда, да придонесуваат во разрешувањето на конфликти потсетувајќи дека честопати токму жените се жртви на воени злосторства.
„Не само денеска, секој ден е потребно да оддадеме почит за храброста на жените во воените конфликти и нивната улога во помирувањето“, истакна Пендаровски.
Во свoето обраќање тој се наврати и на пандемијата која нè соочи со растечка нееднаквост во многу сфери.
„Соочени со предизвиците, жените повторно го понесоа поголемиот товар, преземајќи на себе многукратни улоги и неплатен труд во одржувањето на домовите, образованието на децата, грижата за повозрасните“, рече претседателот.
Пендаровски потсети и на заедничката одговорност при проценката како одлуките и јавните политики влијаат на жените.
„Сите имаме одговорност, но пред сè релевантните институции и политичките чинители, за промените кои ќе овозможат поголемо учество на жените во политиката, донесувањето на одлуките, креирање на политиките, управување со процесите, економскиот развој, науката и иновациите“, рече претседателот, додавајќи дека родовата еднаквост е предуслов за слободно, развиено, демократско, праведно и отворено општество.
„Ги поздравувам заложбите на сите чинители кои работат на унапредување на родовата еднаквост и создавање на општество во кое жените сами ќе ги носат своите животни одлуки, ослободени од родово базирано насилство и сексизам, општество во кое на девојчињата нема да им биде спречен развојот поради предрасуди и стереотипи“, заклучи Пендаровски.
