Претседателот Стево Пендаровски денеска го одликува Бигорскиoт манастир „Свети Јован Крстител“ со Орден за заслуги за Република Северна Македонија, за зачувувањето и за продолжувањето на илјадагодишната традиција и за придонес во негувањето на духовното и на културно-историското наследство, соопштија од претседателскиот кабинет.
Ова високо државно одликување Пендаровски му го додели на епископот антаниски и игумен на Бигорскиот манастир, Партениј, во претседателската резиденција на Водно.
„Бигорскиот манастир, надвор од било какво сомнение, е едно од нашите најголеми духовни светилишта, кое низ вековите, и денес, во континуитет претставува извор на писменост, на култура и уметност. Бигорски не е само православен манастир и христијанско светилиште, тој од секогаш бил прочуен како место каде што помош, поткрепа, човечки збор и утеха можеле да најдат сите, без разлика на нивната верска, етничка или било каква друга припадност. Историјата на манастирот, но, не помалку и неговата денешна, жива духовна и културна мисија и ангажман, лесно ги надминуваат државните граници и ги сплотуваат и обединуваат луѓето што е сигурно најблагородната можна кауза во светот од кој сме дел“, изјави претседателот Пендаровски.
Епископот Партениј посочи дека е значајно што орденот се доделува во време на духовна и морална ерозија, кога искуството на предците е до крајност занемарено и ја поздрави поддршката на државниот врв за признавање на Македонската православна црква, Охридска архиепископија.
Централната прослава на 1000-годишниот јубилеј на Бигорски манастир ќе биде одржана в недела во манастирот, со почеток во 9 часот.
