Под слоганот „Пчелата дел од земјоделско производство кое е погодно за опрашувачите“, денеска во Скопје беше одбележан Светскиот ден на пчелите. Пораката до целата заедница е дека пчелите имаат витална улога во одржливото производство на храна, зачувувањето на природата и зачувувањето на животот на Земјата.
Годинешното одбележување имаше за цел да ја подигне свеста за важноста од примена на земјоделски практики кои се погодни за пчелите и другите опрашувачи, а истовремено придонесуваат за отпорноста, одржливоста и ефикасноста на земјоделско-прехранбените системи, информираат од Амбасадата на Република Словенија во Скопје.
Словенечката амбасада и Земјоделскиот институт-Скопје, во соработка со општина Гази Баба и ФАО, го одбележаа овој ден, со фокус на младите.
Две жени, пчелар и ентомолог, им покажаa на децата од основните училишта во општина Гази Баба како функционира еден семеен бизнис кој произведува природен мед. Тие, исто така, им ги објаснија разликите помеѓу пчелите и другите опрашувачи, придобивките од опрашувачите и што се подразбира под здрави живеалишта на опрашувачите.
Преку дегустација на мед, децата научија за различните видови мед произведени од различни видови пчели. Дополнително, учениците ги изразија своите новооткриени сознанија за важноста на пчелите преку ликовна активност на оваа тема. Настанот заврши со посета на пчеларникот на Земјоделскиот институт, донација од Република Словенија.
„Пчелите и другите опрашувачи се клучни за глобалната безбедност на храната. Секоја трета лажица што ја јадеме зависи токму од нив“, рече економската советничка на Словенија, Ѓуле Вишај во нејзиниот воведен говор.
„Одбележувањето на Светскиот ден на пчелата е можност за глобална соработка, соработка меѓу нашите две пријателски земји и солидарност за заштита на пчелите“, рече таа, поздравувајќи ги младите и поканувајќи ги да уживаат во овогодинешниот Светски ден на пчелата во Скопје.
„Чест ми е да ве поздравам сите во нашиот Институт како домаќин на оваа специјална прослава на Светскиот ден на пчелата. Денеска се собираме да ја препознаеме непроценливата улога што пчелите ја играат во нашиот екосистем и да ја истакнеме критичната важност на нивната благосостојба за нашите земјоделски системи“, изјави Виктор Ѓамовски, директорот на Земјоделскиот институт – Скопје.
„Пчелите, тие мали, но прекрасни суштества, неуморно ги опрашуваат нашите култури, овозможувајќи раст на овошје, зеленчук и безброј други извори на храна кои нè одржуваат. Тие се неопеани херои на нашите полиња и овоштарници, кои тивко ја работат својата магија за да обезбедат нашите чинии да се наполнат и нашите заедници да напредуваат’’, потенцираше Ѓамовски.
„Опрашувачите како пчелите, птиците и лилјаците придонесуваат за 35 отсто од вкупното светско растително производство, опрашувајќи 87 од 115 водечки прехранбени култури ширум светот“, рече Кристина Митиќ Арсова, национален тим лидер на ФАО.
Сепак, бројот на пчелите и многу други опрашувачи се намалуваат. Интензивното земјоделско производство и прекумерната употреба на пестициди претставуваат сериозна закана за пчелите и другите опрашувачи, го намалуваат нивниот пристап до храна, ги изложуваат на штетни хемикалии, го ослабуваат нивниот имунолошки систем и негативно влијаат на биодиверзитетот.
„Светскиот ден на пчелите е можност за сите нас да промовираме акции кои ги штитат опрашувачите и нивните живеалишта. Дури и одгледувањето цвеќиња дома за да се хранат пчелите придонесува за овој напор“, додаде Кристина Митиќ Арсова.
Словенија, заедно со ФАО, беше клучна во воспоставувањето на Светскиот ден на пчелата како меѓународен ден преку резолуцијата на Генералното собрание на ОН усвоена во 2017 година. Официјалната церемонија за првиот Светски ден на пчелата се одржа во 2018 година во словенечкото село Брезница, родното место на Антон Јанша, пчелар и пионер на модерното пчеларство. Неговиот роденден, 20 мај, беше избран да се одбележува секоја година како Светски ден на пчелите.
