Надлежните служби сè уште го расчистуваат патниот правец Шипковица – Бродец – Вешала, кој вчера по големите врнежи од дожд беше затрупан со наноси од камења и земја, но по патот, со претпазливост, поминуваат возила за итни случаи.
Градоначалничката на Тетово, Теута Арифи, која денеска го посети местото, изјави дека градежната механизација и во текот на наредните денови ќе продолжи со работа, за целосно расчистување на патот. Освен на расчистување на патот, како што посочи Арифи, ќе се работи и на преземање на превентивни мерки во случај на нови наноси од камења и земја.
Таа додаде дека во координација со службите на централната власт работат и на отстранување на големите карпи кои што надвиснуваат над патниот правец Шипковица – Бродец и претставуваат опасност.
Вчера, исто така, беше затрупан и патот на влезот во Шипковица, кој за неколку часа беше расчистен.
Во невремето во Шипковица нема настрадани лица, а не е предизвикана ниту материјална штета на домовите. Сепак жителите и натаму стравуваат од поголеми катастрофи со оглед на најавените врнежи од дожд во наредните денови.
Во селото Голема Речица, вчера врнежите од дожд го зголемија нивото на реката, но таму ситуацијата е под контрола и нема поплави или оштетувања на имотите на граѓаните. Оперативните екипи се на терен и се во постојан контакт со локалните жители.
Во минатогодишните поплави во Тетовско загинаа шест лица, а беа оштетени и стотина домови.
