Есенва, како и децении наназад, „Македонија пат“ стави забрана до 1 април за користење на патниот правец кој води преку Галичица од ресенското село Царина до Трпејца.

Наместо државата сите овие изминати години да направи напор и да го санира, таа повторно става забрана за негово користење, и покрај тоа што Охрид е се поинтересна дестинација за сите оние кои ги сакаат алтернативните форми на туризам, планинарењето и зимските спортови. Галичица е привлечна и за домашните и за странските посетители, но тешко пристапна.

Сезонското затворање на патниот правец Охрид-Ресен преку Галичица со години наназад од „Македонија пат“ го правдаат со економска неисплатливост за негово одржување. Но низ годините имаше и иницијативи и барања овој патен правец да се реконструира, прошири, одржува и да биде ставен во функција и преку зимските месеци во интерес на туризмот и искористување на потенцијалот на Галичица.

„Патот е една од пречките која не спречува да имаме поголем проток на луѓе во зимскиот период и со тоа се пренасочуваат луѓето на други места како што се Маврово, Попова Шапка, иако природните услови на Галичица се подобри. На пример на Попова Шапка одат и луѓе кои не скијаат, а одат на рекреативни прошетки, на пешачење на планинарење,“ вели Антонио Додевски професионален водич на планина.

Тој истакнува дека уште позбунувачко е што од една страна се забранува сообраќај на овој патен правец, а од друга страна на почетокот на овој пат има знак на кој стои дека патот е прооден до Корита. Па поради ваквите пропусти многупати посетители на Гaличица заглавиле одејќи кон планината, па морало да се интервенира и да се спасуваат.

„Се надеваме дека во иднина сите надлежни институции ќе го разберат од една страна потенцијалот, а од друга заканата и ризиците и ќе мора да работат на подобрување на инфраструктурните услови за да може тоа да се одвива безбедно“, вели Додевски.