Предлог буџетот за 2025, според владеачката ВМРО ДПМНЕ предвидува 50,5 милијарди денари за капитални инвестиции, што според нив ќе придонесе за подобар животен стандард. За опозициската СДСМ, пак, предлог буџетот на владата на Христијан Мицкоски е најрасипнички во историјата на Македонија.
Од владеачката партија посочуваат дека буџетот е развоен што се гледа во планираните инвестиции во инфраструктура, училишта, градинки, болници и други јавни објекти, како и од зголемувањето на средствата за Министерството за транспорт за речиси 70 проценти или околу 7 милијарди денари.
„Во предлог буџетот за 2025 година на Владата предводена од ВМРО- ДПМНЕ предвидени се рекордни 50,5 милијарди денари за капитални инвестиции. Во оваа сума вклучени се проекти како патната инфраструктура за коридорите 8 и 10д, потоа експресни патишта, железници, изградба на објекти“, посочуваат од ВМРО ДПМНЕ.
Од СДСМ, пак, велат дека буџетот тежок 6,5 милијарди, нема да се троши за поголеми плати на работниците, повисок животен стандард на граѓаните, образование, здравство, раст и развој на економијата, туку за луксуз на власта.
„Власта ги зголемува трошоците за службени возила за 75 отсто и за купување мебел, предвидува зголемување и на непродуктивните трошоци за стоки и услуги, а во ист момент ги крати капиталните расходи во клучни сектори како образование и здравство“, велат од СДСМ и посочуваат дека расипничкото однесување се случува во услови на високо ниво на јавниот долг кој со новите долгови ќе ја надмине границата од историски највисоко ниво од 70,8 отсто.
