Основниот суд Кочани денеска на својата веб-страница објави соопштение, со кое информира за донесените мерки за обезбедување присуство на осомничените во истрагата за пожарот во импровизираната дискотека „Пулс“ во Кочани во кој до сега починаа 62 лица. Од судот велат оти постапуваат по жалби на 12 осомничени за трагедијата во Кочани.
„По поднесените предлози за определување на мерка притвор а врз основа на донесена Наредба за истражна постапка Ко бр.180/25 од 20.03.2025 година на ОЈО Кочани, од страна на Судија на претходна постапка беа определени вкупно 24-дваесет и четири мерки за обезбедување на присуство –притвор, од кои по изјавена жалба од осомничените преку нивните бранители изречената мерка притвор беше замената со мерка куќен притвор за тројца осомничени, а во понатамошниот тек од постапката по даден предлог на ОЈО Кочани за замена на мерката притвор со мерка куќен притвор за 4-четири осомничени беше определена мерка куќен притвор“, пишува во соопштението.
Порталот „360 степени“ објави дека ексминистерот за економија, Крешник Бектеши останува во притвор, а таму е од почетокот на истрагата за пожарот во кабаре „Пулс“.
Поранешниот градоначлник на Кочани, Љупчо Папазов, кој си поднесе оставка од функцијата по трагедијата, од затворски, ќе оди во куќен притвор. Во куќен притвор се и неговите претходници на функцијата градоначалник, Ратко Димитриевски и Николчо Илијев.
Другите поранешни министри за економија, Ваљон Сарачини и Беким Незири, се исто така во куќен притвор, додека за Дритон Кучи се изречени мерки на претпазливост.
Јавното обвинителство денеска демантираше дека обвинител се повлекол од случајот.
