Воената вежба „Одлучен удар“ на полигонот Криволак, 31 мај 2021. Фото: Кабинет на претседател на РСМ и Собрание на РСМ

На 24 март, војници од осум земји на НАТО почнаа да пристигнуваат во Северна Македонија за воената вежба „Брз одговор 22“ [SWIFT RESPONSE 22], вежба на сојузничките воздухопловно-десантни сили, што е дел од пошироката серија вежби кои се одржуваат низ цела Источна Европа.

Дури 1.800 падобранци од 16-та воздухопловна јуришна бригада на Обединетото Кралство пристигнаа во Северна Македонија за да одржат обука заедно со седум други земји на НАТО, вклучително и силите од Северна Македонија, на четири различни локации низ земјата.

Во текот на следните недели, 2.700 војници од Албанија, Франција, Грција, Италија, Северна Македонија, Црна Гора, Обединетото Кралство и САД ќе спроведат обуки, вклучително и обука со боево гаѓање, како и дневни и ноќни скокови со падобран. На обуката ќе се демонстрира способноста на земјите-членки на НАТО да се распоредат насекаде низ светот и способноста на нивните војници да работат заедно професионално и успешно.

Оваа годишна вежба, која годинава се случува во Северна Македонија, е клучен придонес за европската безбедност, која има за цел да испорача сили со висока готовност во низа улоги, да го зголеми капацитетот и да ги дополни НАТО и другите европски и глобални безбедносни аранжмани.

Од Обединетото Кралство, распоредена е 16-та воздушна јуришна бригада со 1.800 војници – падобранци, инженерци, артилерија, логистичари, медицински лица, воено разузнавање, специјалисти за комуникации, армиски воздухопловен корпус, кралски воздухопловни сили, механичари и специјалисти за уништување на експлозивни убојни средства.

Бригадата се распоредува во вежби и операции на глобално ниво со сите возила и опрема потребни за самоодржливост, вклучувајќи хеликоптери, теренски транспортери на тркала и гасеничари, артилериски пушки и мноштво логистички и инженерски возила.

Командантот на кралските инженерски падобранци, потполковник Џек Кросли, е во Северна Македонија од 24 март. Тој го надгледуваше движењето на бригадата од Обединетото Кралство кон Северна Македонија.

„Движењето на речиси 2.000 британски војници и сите возила и опрема што доаѓаат со една бригада низ Европа и во Северна Македонија беше огромна задача, која немаше да можеме да ја направиме толку ефикасно без поддршката на Владата на Северна Македонија и вооружените сили. Имавме исклучително топло добредојде и сега се сместивме и сме подготвени да ја започнеме главната вежба со војниците од Северна Македонија и шест други партнерски земји“, објаснува потполковник Џек Кросли.