Гласањето на седмите локални избори од осамостојувањето на државата, започна во седум часот утринава. Државната изборна комисија (ДИК) во 9.30 часот ќе соопшти за навременото отворање на сите 3.480 избирачки места.
Право на глас ќе имаат 1.824.864 гласачи впишани во Избирачкиот список. За 80 општини и Град Скопје, граѓаните денеска ќе избираат нови градоначалници и општински совети од пријавените 299 кандидати за градоначалници и 10.532 кандидати за членови во општинските совети.
За да може да се изврши успешен избор на градоначалник, неопходно е на избирачките места да излезат една третина од вкупниот број гласачи кои се запишани во Избирачкиот список во конкретната општина.
За првпат на изборите во земјава, денеска на избирачките места ќе се гласа со биометриска проверка на секој одделен гласач. Пред да може секој граѓанин впишан во Избирачкиот список да гласа, неопходно ќе биде преку уредот за биометриска идентификација да се провери неговиот отисок на прст, којшто ќе треба да се совпаѓа со отисокот кој го има во базата која е внесена во уредот за идентификација.
