Регионален младински саем за вработување ќе се одржи на 28 февруари во Скопје, за кој Националниот младински совет на Македонија (НМСМ) ги објави повиците за учество на млади лица и правни субјекти.
Саемот е замислен како отворена платформа за градење вештини и компетенции за вработување на младите како и креирање на можности за нивно поврзување со работодавачите. Предвидено е да се одржат три активности – саем на компании, speed date за меѓусебно запознавање на компаниите и младите и youth booth за спроведување интервјуа со пријатна и приватна атмосфера.
Сите правни субјекти кои се заинтересирани за учество во Регионалниот младински саем за вработување треба да бидат од Скопскиот регион и да имаат регистрирано профил на платформата CareerHub. Младите што сакаат да учествуваат на повикот треба да имаат до 29 години и да имаат регистрирано профил на платформата CareerHub.
Пријавувањето трае до 10 февруари со пополнување на формуларот за регистрација за правни субјекти и за млади.
Од НМСМ информираат дека пред саемот ќе се одржи и обука за кариерно насочување за сите заинтересирани млади лица чиј фокус ќе биде креирање на професионална биографија, спроведување интервју со компании, како и други корисни совети за подобро претставување пред потенцијални работодавачи. Саемот ќе се одржи во склоп на проектот „МладиХаб – градење вештини за вработување, компетенции и можности за вмрежување на младите”.