Отворен Дино паркот во Скопје – 41 реплика со движења и звуци ќе ги забавуваат граѓаните [галерија]

Извор на фотографија: Град Скопје

Скопје доби нова туристичка атракција, Дино паркот лоциран веднаш до скопската зоолошка градина синоќа беше официјално отворен за посетители. За сите оние кои сакаат да се впуштат во нови и возбудливи авантури, да дознаат нешто повеќе за неверојатниот свет на диносаурусите и имаат желба да видат како изгледале Тираносаурус, Стегосаурус и Алосаурус во природна големина, од денеска ќе имаат прилика тоа да го искусат и доживеат, информираат градските власти.

„Дино паркот се простира на површина од 2.000 квадратни метри и има вкупно 41 реплика на диносауруси од креда и јура периодот, од кои дел се во природна големина со синхронизирани движења, проследени со звуци. Дополнително во Дино паркот функционално се распоредени и придружни елементи – патеки, зеленило и дел за одмор. Ова е првиот Дино парк на Балканот каде што има толкав голем број фигури од праисториски животни, како и едукативни содржини за секој од различните видови животни“, изјави синоќа скопскиот градоначалник Петре Шилегов.

Тој дополни дека за изградбата на овој парк од Буџетот на Град Скопје се потрошени околу 350.000 евра, што во време на епидемијата со корона вирусот претставува добра замена, неколкукратно поевтина од забавниот парк, чија изградба мораше да ја одложиме за една година.

„Ќе продолжиме и понатаму да го збогатуваме градот и со едукативни содржини претежно за најмладите, но и со содржини кои ќе го подигнат квалитетот на туристичката понуда што секако ќе даде позитивни ефекти кои ќе влијаат на сите жители на градот“, изјави Шилегов на отворањето на Дино паркот.

Дино паркот има два влеза, еден од внатрешноста на Зоолошката градина и уште еден од страната на Градскиот парк, а билетот за влез ќе чини 50 денари.