Фото: Мета.мк

Заменик-министерот за здравство, Илир Хасани како и двајцата директори на тетовската клиника, медицинскиот директор Флорин Бесими и економскиот директор Артан Етеми, попладнево еден по друг, тројцата на Фејсбук најавија дека поднесуваат оставки од функциите од морални причини.

„Во овие тешки моменти за сите нас, поднесувам оставка како највисок морален чин. И покрај фактот дека немам никаква врска со процедурите за формирање модуларна болница, иако немам никаква врска со организацискиот дел, оставката е најмалиот чин што можам да го направам во моментов, да ги почитувам жртвите, повредените, јавноста и себеси. Нема ништо над достоинството!“, напиша заменик-министерот Хасани.

„Чувствувајќи ја длабоката болка од трагедијата што се случи во модуларниот центар во Тетово, каде што бев и лично присутен, од тажните слики што ги доживеав извлекувајќи ги со свои раце телата на жртвите, во својство на економски директор ја давам мојата оставка од оваа позиција од морален чин“, напиша Етеми.

 

„Почитувани, со голема тага за секоја жртва и за секој член на нивното семејство, Ве информирам дека, поради оваа морална одговорност која ја чуствувам, давам оставка од раководното место директор на Клиничката болница Тетово“, напиша меѓу другото директорот Бесими.

„Мојата оставка нема да ги утеши семејствата, но верувам дека ќе постави една морална линија, која сите како општество сме ја заборавиле“, додаде тој.

Заменик-министерот Хасани и директорот Бесими се кадар на ДУИ, додека Етеми е од БЕСА.

По трите оставки, за во 19 часот закажана е прес-конференција на министерот за здравство Венко Филипче.