Повеќе од 20 лица се осомничени, а 15 се наоѓаат во полициска станица во врска со трагичниот настан синоќа во дискотека во Кочани во кој загинаа 59 лица. Министерот Панче Тошковски информира дека неколкумина од осомничените се починати, а некои се и во болница, меѓу кои и два члена на бендот, син на сопственик на дискотека и управител на фирмата која што ја менаџирала дискотиката.
„Дел од приведените лица, коишто се во полициска станица, се луѓе кои имаат директна вина со овој настан, меѓу кои и организаторот на настанот. Исто така приведени се поранешен државен секретар на министерство за економија, раководител на еден сектор во рамки на министерство за економја, пораншен директор на Дирекцијата за спасување и тројца вработени, рече Тошковски и додаде дека некои од приведените биле дел од организацијата на настанот или работеле како обезбедување.
Во дискотеката присутни биле околу 500 лица, продадени биле околу 250 карти. До моментов извадени се сите тела на починатите, а по завршувањето на идентификацијата, списоците ќе бидат доставени до семејствата, рече Тошковски.
