Основниот суд Скопје 1 го одобри обвинението за терористичка организација и за тероризам за 29 обвинети за случајот „Диво Насеље“. Сè уште не се знае точниот датум кога тие ќе седнат на обвинителна клупа. Денеска судот излезе со соопштение откако пред десет дена се одржа јавната седница за оцена на обвинителниот акт.
„Советот за оцена на обвинителен акт донесе одлука со која обвинителниот акт се одобрува, а приговорите на обвинетите се одбиваат како неосновани. По детална анализа на наводите наведени во писмените приговори на обвинителниот акт, доставени до судот, како и на наводите на обвинетите и на нивните бранители дадени на јавно одржаната седница за оцена на обвинителен акт и ценејќи ги фактите врз кои се заснова актот, го одобри обвинителниот акт, а приговорите ги одби како неосновани“, пишува во соопштението.
Сега се очекува да се одреди надлежниот судски совет за постапување, по што ќе биде закажан термин за одржување на главната расправа, а за што судот дополнително ќе ја извести јавноста.
