Граѓанскиот суд Скопје, на 3 февруари пресуди дека Здружението „Од нас за нас“ сторило клевета против ХЕРА – Асоцијацијата за здравствена едукација, поради континуирано изнесување невистинити факти за самата организација и за сеопфатното сексуално образование преку неговата Фејсбук-страница.
Како што велат во асоцијацијата, Граѓанскиот суд потврдил дека невистините изнесени од страна на „Од нас за нас“ се штетни за угледот на ХЕРА како организација која повеќе од 20 години работи на подигање на јавната свест, особено кај младите, за важноста од добивање научно-засновани информации за нивната безбедност, благосостојба и репродуктивно и сексуалното здравје. Судот го задолжило Здружението да ја отстрани лажната содржина од својата Фејсбук-страница.
„Судот постапуваше по тужба за утврдување граѓанска одговорност за навреда и клевета што ХЕРА ја поднесе лани, по првиот бран лажни и манипулативни информации за неа и за сеопфатното сексуално образование што се појавија во одредени групи на социјалната мрежа Фејсбук. Оттогаш вакви невистинити информации се креираат и споделуваат уште поактивно со една единствена цел – да се предизвика страв и паника кај граѓаните, поради што Судот одлучи дека треба да бидат отстранети од социјалните мрежи“, велат од ХЕРА.
Оттаму апелираат до сите граѓани, а особено до родителите и младите да ги земат со голема доза на претпазливост и да ги проверуваат сите информации коишто на Фејсбук ги споделуваат здружението „Од нас за нас“ и нему сличните.
„Иако се претставуваат како заштитници на правата на децата, нивните објави за сеопфатното сексуално образование се полни со ксенофобија, расизам и нетолеранција и се базирани на теории на заговор поради што го загрозуваат јавното здравје и се косат со правото на децата да имаат пристап до точни информации, како и до знаења и вештини кои во иднина ќе им овозможат да бидат побезбедни и поздрави“, се додава во соопштението од асоцијацијата.
Оттаму потенцираат дека од неодамна овие чинители биле дел и од т.н. Коалиција за заштита на децата меѓу чии партнери има организации и политички партии коишто се против правото на абортус и репродуктивната слобода, како и лице за кое Комисијата за спречување и заштита од дискриминација веќе даде мислење дека сторило продолжено и повеќекратно вознемирување, со што се поттикнува омраза кон одредена маргинализирана група во општеството.
„Потсетуваме дека сеопфатното сексуално образование придонесува во заштитата на здравјето и за правилен емоционален развој на младите. Преку него, младите стекнуваат информации за своите граѓански права и за правата на сите останати граѓани во земјата, учат како да препознаат и да се заштитат од вознемирување и насилство, вклучително и на интернет. Учат и што значи да постои рамноправност меѓу мажите и жените и како да се грижат за своето сексуално и репродуктивно здравје“, велат оттаму.
Сеопфатното сексуално образование е препознаено и од многу меѓународни организации, Советот на Европа и агенциите на ООН како неопходно во борбата против родовите стереотипи и насилството врз жените и децата, но и како образовна алатка за заштита на здравјето, заради што и фигурира во низа препораки што ѝ се дадени на нашата земја. Дека овие теми се суштински важни за развојот на децата потврдуваат и нашите истражувања и искуства од терен, собрани преку долгогодишната програма за неформално сеопфатно сексуално образование и тоа не само од младите, туку и од родителите и наставниците.
„Токму затоа, ХЕРА ќе продолжи да следи како се објавуваат содржини за сеопфатното сексуално образование на социјалните мрежи и силно ќе се спротивстави на какви било лаги, манипулации и теории на заговор кои, на крајот на краиштата, најмногу им штетат токму на децата и младите“, наведено е во соопштението од ХЕРА.
