Иднината на регионот, со фокус на регионалната соработка, и пораката дека евро-атлантската перспектива и интеграција на целиот регион останува недвосмислена определба на двете држави, денеска беа содржината на разговорите меѓу министерот за надворешни работи Бујар Османи, претседателката на Косово, Вјоса Османи-Садриу и претседателот на парламентот, Глаук Коњуфца, а во рамки на официјалната посета Османи на Република Косово, соопштија од МНР.
„Заедничка амбиција е целосна интеграција на сите земји од регионот на Западен Балкан во Европската Унија. Како земја-членка на НАТО и земја-кандидат за членство во ЕУ, подготвени сме да ги ставиме нашите знаења и искуства на располагање на нашите пријатели во Косово. Европската интеграција значи пред сè институционален и економски напредок, но уште повеќе, во својата суштина, таа носи пријателство, солидарност и сигурност – вредности за траен и долгорочен мир, стабилност и севкупен напредок, како најзначајна потреба на нашите граѓани“, нагласи Османи.
Тој додаде дека, без оглед на предизвиците со кои се соочува, а според демократскиот и реформскиот исчекор, Северна Македонија за време на португалското претседавање со Советот на ЕУ, очекува одржување на првата меѓувладина конференција со ЕУ, што ќе означи и почеток на формалниот процес на преговори.
„Очекуваме што поскоро формирање на владата на соседна Бугарија, по што би се продолжило со заокружување на акцискиот план за соработка, а со тоа и со зајакнување на билатералните односи и довербата меѓу Северна Македонија и Бугарија“, порача Османи.
За време на средбите, меѓу другото, начелно се разговарала и за парламентарната соработка и учеството на припадниците на Армијата на РСМ во рамки на мисијата на КФОР во Косово.