Вицепремиерот за европски прашања, Бујар Османи, на „Фејсбук“ дообјасни дека без референдум нема да биде донесено заедничко прифатливо решение за спорот за името, откако вчера во интервју на телевизија „Алсат М“ изјави дека Македонија може да избегне референдум по ова прашање.
„Во жестината на дебатата, некои работи не ги објаснив доволно прецизно, па дозволете да бидам прецизен. Владата доби доволно политичка поддршка за да може храбро да влезе и во решавање на спорот за името. Но, тоа не значи дека евентуалното заемно прифатливо решение би било донесено без за тоа да бидат прашани граѓаните, т.е. без референдум“, напиша Османи на својот фејсбук-профил.
На прашањето како ќе се затвори прашањето за името и дали тоа ќе биде со референдум, Османи вчера рече дека локалните избори практично биле референдум затоа што ја добиле поддршката од граѓаните.
– На овие избори ние го најавивме решавањето на името. Граѓаните ни ја дадоа поракатата – вие сте храбри, имате јасна визија каде треба да ја водите државата во наредните години – рече Османи.
