Локалната самоуправа од Охрид ќе субвенционира бесплатни курсеви по англиски, германски јазик и по информатика, за 34 невработени лица и студенти од градот, за што претходно беше распишан конкурс. Предавањата, од денеска, се одржуваат во просториите на работничкиот универзитет „Кузман Шапкарев“.
На конкурсот за бесплатни курсеви можеа да се пријават невработени лица и студенти кои живеат во семејства со ниски месечни примања или се социјални случаи.
– Од бесплатните курсеви, 14 се по англиски, 16 по германски јазик и четири курсеви се по информатика. Износот за еден курс по англиски и по германски јазик е 2.000 денари, односно за 30 курсеви по овие два странски јазици Општината предвиде 60.000 денари. Износот за еден курс по информатика е 1.500 денари, односно за четирите курсеви се издвоени 6.000 денари. Ова значи дека од својот буџет Општина Охрид за бесплатните курсеви по англиски, германски јазик и по информатика издвоила 66.000 денари – информираат од Општината.
