Градежен инспектор, припадници на МВР, претставници од Општина Центар, со градежна механизација, утринава интервенирале на спорното градилиште на улицата „9 Мај“ и започнале со затрупување на градежната јама и враќање на локацијата во првобитна состојба, каде инвеститорот градел надвор од издаденото одобрение за градење, информираа од Општина Центар.
Градежната инспекција претходно го затворила градилиштето, а во март годинава одговорните биле санкционирани од општината со казни од 12.500 евра.
„Пред неколку месеци настана проблем од страна на инвеститорот ‘Бинјапи Инжинеринг’, фирмата која што го има одобрението за градба. Јамата не беше целосно обезбедена според даденото решение, односно зградите не беа целосно заштитени од страна на инвеститорот. Не беа поставени оние тн. ‘шипови’ кои што се за заштита на целото околно земјиште, вклучувајќи ја улицата и зградите. Наместо -1, направени се -2 спрата. Нашите инспектори и тогаш постапија, ставија жолта лента, беше стопирана градбата, но самиот инвеститор продолжи со градба. Ние како општина по извесен период постапуваме на терен, односно по пишаното решение од градежниот инспектор за враќање на првобитноста на самото земјиште. Истото денеска го спроведуваме, односно го враќаме земјиштето во првобитна состојба“, изјави градоначалникот Горан Герасимовски.
Инспекцијата, според него, утврдила дека инвеститорот постапувал спротивно од издаденото одобрение за градење. Инвеститорот „Бинјапи Инжинеринг“ бил обврзан да постави армирано бетонски колови, тн. шипови, за обезбедување на јамата, кои тој не ги извел и со тоа постапил спротивно на одобрението за градење. По ова, согласно Законот за градење, инспекцијата изготвила решение за враќање на локацијата во првобитна состојба, со што трошокот за извршувањето на решението ќе се фактурира на инвеститорот и тој е обврзан да ја врати улицата во првобитна состојба.
