Врховниот комесар за човекови права на ОН, Зеид Рад ел Хусеин, го повика Советот за безбедност на ОН да го ограничи правото на вето на своите постојани членови за решавање на проблемот во Алепо.
– Цврсто верувам дека дојде време за силно раководење и за смели акции, а Советот за безбедност на ОН би требало без одложување да ги усвои критериумите за одвраќање на членовите од користењето на правото на вето, кога постојат сериозни проблеми, зашто можеби се извршени воени злосторства, злосторства против човештвото или геноцид – изјави комесарот.
Шефот на руската дипломатија, Сергеј Лавров, и американскиот државен секретар, Џон Кери, завчера телефонски ги разгледувале заедничките мерки за решавање на ситуацијата во Алепо.
Подоцна претставникот на американскиот Стејт департмент, Џон Кирби, изјави дека Вашингтон го прекинува учеството во билатералните канали за комуникација со Москва за ситуацијата во Сирија.
Постојаниот претставник на Русија во ОН, Виталиј Чуркин, изјави дека нема алтернатива на преговорите меѓу Русија и САД за решение на воениот судир во Сирија.