Обединетите нации (ОН) се подготвени да почнат со доставување помош за луѓето во подрачјата што се под опсада во Сирија, пренесуваат светските медиуми. ОН сакаат да го искористат примирјето што го договорија Соединетите Американски Држави (САД) и Русија, а кое стапи на сила во саботата на полноќ.
Првите пратки со хуманитарна помош, според планот, треба да бидат доставени денеска. Во наредните пет дена, според планот на ОН, помош треба да добијат 150.000 Сиријци кои се заглавени во подрачјата што се под опсада.
Обединетите нации се надеваат дека до крајот на март ќе успеат да достават помош за околу 1,7 милиони луѓе.
Ситуацијата во Сирија, по стапувањето на сила на примирјето, според „Би-би-си“, е подобрена и покрај обвинувањата од двете страни за прекршувања на договорот за прекин на огнот.
На првиот ден од склученото примирје во Сирија, загинаа повеќе од 180 лица. Од Сирискиот центар за надзор на човековите права соопштија дека половина од лицата загинале во напади на Исламска држава во северните делови на земјата.
