Триесет и три лица загинаа, а повеќе од 200 се повредени во судирите што завчера избија во Нагорно Карабах, соопшти Управата за координирање хуманитарни прашања на Обединетите нации.
„Според официјални извори од Ерменија и од Азербејџан, најмалку 30 војници и тројца цивили загинале во борбите. Бројот на повредените лица сè уште не е официјално потврден, но се претпоставува дека надминува 200 лица“, се наведува во извештајот на организацијата.
Обединетите нации соопштија дека во местата во кои избиле судирите живеат околу 14.400 лица, но оти нема информации дали е потребна евакуација на цивили и достава на хуманитарна помош.