„Груба повреда на правата на учениците претставува промената на рокот за полагање на државната матура од 4 јуни на 28 мај, во услови кога редовната настава за матурантите завршува на 20 мај. Со тоа на учениците им се скратува времето за подготовка за полагање на овој испит, со што уште еднаш се потврдува дека воопшто не се води сметка дали промената негативно ќе влијае на понатамошното образование на ученикот, ако се има предвид дека оценките од државната матура битно влијаат на успехот на ученикот, а со тоа и добивањето бодови за запишување во високообразовните институции“, се вели во реакцијата од канцеларијата на Народниот правобранител.

Оттаму го повикуваат министерот за образование и наука веднаш да ја повлече оваа одлука, затоа што не е во согласност со Законот за средното образование, ниту со подзконските акти кои поблиску ја уредуваат оваа материја, а е спротивна и со Конвенцијата за правата на детето, според која, секогаш на прво место е најдобриот интерес на детето.

Мета“ неодамна пишуваше дека и екстерното тестирање на учениците годинава се поместува за неколку дена подоцна, поради изборите.

Kако што нè информираа наставниците, во новиот план стои дека екстерното тестирање ќе почне на 9 јуни, а ќе заврши на 14 јуни, што е поместување од речиси цела недела. Само за споредба, минатата година екстерното тестирање се одржа од 2 до 10 јуни. Инаку, дознаваме дека во некои училишта директорите веќе ги известиле советите на наставници за новите термини за екстерно тестирање.

Во дописот до кој дојде „Мета“ се гледа дека распоредот за тестирање ќе биде објавен на 2 јуни, за разлика од минатата година, кога бил објавен на 28 мај.

Деветтите одделенија, според новиот план, ќе се тестираат од 9 до 13 јуни.

Со сето ова, велат наставниците, се поместува и учебната година, затоа што се одложуваат и датумите за жалби. Целиот процес со екстерното тестирање, според измените, треба да заврши на 15 јули, кога сите резултати треба да бидат внесени во системот.

Според Календарот за организација на учебната 2015/2016 година во основните училишта, подготвен од Министерството за образование и наука, второто полугодие почнува на 20 јануари, а завршува на 10 јуни 2016 година, а летниот распуст почнува на 11 јуни 2016 година.

Народниот правобранител смета дека одржувањето на предвремените парламентарни избори не треба да влијае на образованието на учениците, ниту да биде причина за промена на роковите за полагање на државната матура.

„Во случајот загрижува и тоа што учениците повторно ниту се прашани, ниту е побарано нивното мислење, иако станува збор за активност која директно се рефлектира на нив самите и на нивното понатамошно образование. Оттука, не само што со оваа одлука се повредува принципот на најдобриот интерес на детето, туку не се почитува ниту принципот на учество на децата, односно сослушување на нивното мислење, на што обврзува Конвенцијата за правата на детето“, порачува Народниот правобранител.

Омбудсманот потсетува дека успехот од државната матура може да биде одлучувачки фактор за тоа дали ученикот ќе се запише на факултет или не, односно дали ќе го продолжи своето образование, како и дали висината на партиципацијата ќе изнесува 200 или 400 евра во денарска противредност, факт што не е за занемарување.