Фото: Сашо Спасоски

Министерот за здравство Венко Филипче на денешната прес-конференција изјави дека околу 180.000 македонски граѓани во моментов се наоѓаат на список и чекаат за да примат прва доза вакцина против ковид-19. На новинарското прашање дека нема доволно вакцини за аплицирање на прва доза за пријавените граѓани, тој рече дека веќе ги уфрлиле во системот 10.000-те вакцини од „Фајзер/Бионтек“ коишто пристигнаа во земјава во понеделникот.

Во однос на 500.000 дози од кинеските вакцини „Синовак“, министерот Филипче рече дека утрово стигнала информацијата дека земјава може да ја очекува оваа пратка да стигне во следните 7 дена. Како и првите количини на вакцини од „Синофарм“, и вакцините на „Синовак“ ќе пристигнат во претходно пакувани шприцеви, што треба да ја забрза процедурата за вакцинација на заинтересираните граѓани.

И покрај малата резерва околу датумот, Филипче сепак рече оти верува дека кинеските вакцини ќе пристигнат наредните 7 дена. Заедно со планираните 70.000 дози на вакцини од „Астра Зенека“ кои ќе пристигнат деновиве како донација од Грција и Бугарија, Филипче се надева дека моменталната состојба со мал број вакцинирани со прва доза ќе се смени целосно во следните 7 до 10 дена.

Во однос на руската вакцина „Спутник В“, Филипче рече дека во неговата комуникација со рускиот амбасадор апсолутно нема никаква промена во односите по протерувањето на рускиот дипломат од земјава. Филипче рече дека амбасадорот на Руската Федерација му рекол дека се очекува доцнење на испораката на количеството руски вакцини, којашто требаше да се случи до крајот на мај.

Министерот за здравство се надева дека сликата со бројот на вакцинирани лица целосно ќе се смени до крајот на јуни.

„Во еден момент, кога ќе се исцрпат од списокот сите граѓани од пријавените, веројатно пунктовите ќе работат и отворено, без закажувања“, изјави Филипче.

Тој додаде следниот состанок на Комисијата за заразни болести ќе се одржи пред 15 јуни, а дотогаш тие ќе работат заедно со организаторите на разни настани (концерти и сл.) кои се планираат да се организираат летните месеци, за да се изработат соодветните протоколи за заштита од ковид-19.

Доколку продолжат ниските бројки на новозаболени лица од ковид-19, Филипче смета дека по 15 јуни може да се очекуваат дополнителни олеснувања на рестриктивните мерки. Првата е укинување на полицискиот час низ целата земја, а второто е давањето препорака за организирање на настани (концерти и сл.).