Основното јавно обвинителство за гонење организиран криминал и корупција информира дека денеска до Основниот суд Скопје 1 поднесе обвинителен акт против шест лица осомничени во предметот „Еразмус“. ОЈО ја запрело истражната постапка за Т.Ф., ценејќи дека нема докази што потврдуваат дека осомничениот го сторил кривичното дело.
„Обвинителството ги товари обвинетите врз основа на докази што го потврдуваат основаното сомневање дека повеќепати во подолг временски период, односно во текот на 2015 и 2016 година, како лица вработени на Економскиот факултет при Универзитетот „Св. Кирил и Методиј“ – Скопје, искористувајќи ја својата положба, сториле кривични дела. Обвинетите Б.Ш. и С.Р. се товарат за примање поткуп од чл.357, ст.1, лицето Д.Ј. се обвинува дека примало поткуп, односно сторило кривично дело од чл.357, ст.1, и примило награда за противзаконито влијание од чл.359, ст.2 од Кривичниот законик. Обвинетите Љ.Ј. и С.Д. се товарат за злоупотреба на службената положба и овластување од чл.353, ст.1 од Кривичниот законик. Со обвинителниот акт се обвинува и лицето Д.Д. за три кривични дела давање поткуп од чл.358, ст.1 од Кривичниот законик, стои во соопштението.
Кога беше изведена акцијата „Еразмус“, медиумите пишуваа дека зад иницијалите Т.Ф. стои академик Таки Фити, актуелен претседател на МАНУ и поранешен министер за финансии во владата на СДСМ од 1996 до 1998 година.
