Судското рочиште за настаните во кумановско Диво Насеље од 9 и од 10 мај минатата година, закажано за денеска, е одложено откако адвокатите на обвинетите реагираа до судот дека не се обезбедени услови за фер судење и дел од нив ја напуштија судницата.
Прв судењето го напушти адвокатот Насер Рауфи, кој застапува осум обвинети. Тој пред судот образложи дека салата во која се одржуваат рочиштата е претесна и роднините на обвинетите што дошле пред судот немаат можност да го следат процесот. Рауфи посочи дека судот е должен да обезбеди услови за непречено одвивање на рочиштата.
Судијката Верка Петковска, која го води предметот, рече дека судот ја има само таа поголема судница и дека, според неа, обезбедени се можности за присуство на сите обвинети и на дел од роднините.
Таа ги предупреди адвокатите дека доколку некој ја напушти судницата, ќе биде казнет според законот.
На тројцата адвокати, Насер Рауфи, Бујар Дардишта и Мефаиљ Арслани, кои го напуштија рочиштето, Судскиот совет им изрече казни од 1.200 евра поради навреда на судот, нарушување на редот во судницата и непочитување судска одлука. Рауфи и Дардишта ќе треба да ги платат и трошоците за денешното рочиште.
Адвокатот Љупчо Веселиновски по одложувањето на денешната расправа, пред новинарите изјави дека доколку на наредното рочиште, кое е закажано за 8 март, не бидат исполнети условите, сите адвокати на одбраната ќе го бојкотираат судењето.
На денешното рочиште искази пред судот требаше да дадат четворица сведоци од Диво Насеље и еден полицаец.
Поради капацитетот на судницата, новинарите го следеа судењето преку директен видеопренос во библиотеката на Основниот суд Скопје 1.