Денеска кај местото Карпалак се одбележа петнаесетгодишнината од крвавиот масакр, кога во 2001 година, животот го загубија десет припадници на Армијата на Република Македонија. Чествувањето започна со помен парастос, а на местото на трагедијата букети цвеќиња положија повеќе делегации, преставници на политички партии и здруженија на граѓани.
Присутен беше и Министерот за одбрана Зоран Јолевски, но одби да даде изјава за медиумите. Пред медиумите говореше Јордан Трајкоски од Здружението на резервни воени обврзници 2001-2002 година. Тој искажа разочарување од институциите, што сè уште на месноста Карпалак нема спомен обележје во чест на загинатите бранители.
– И по 15 години од конфликтот нашата држава и нашите власти не презедоа ништо околу одбележувањето и правата на бранителите од конфликтот во 2001 година. Еве и на ова место било какво обележје да се поставеше – изјави Трајкоски.
Крвавиот масакр кај месноста Карпалак се случи на денешен ден во 2001 година околу 10 часот. Конвојот на АРМ кој се движеше кон Тетово со ракетни фрлачи и автоматско оружје беше подмолно нападнат од заседа од страна на паравоените албански формации. При тоа беше погодено едно транспортно возило на АРМ, во кое беа 8 војници и двајца офицери, сите од резервниот состав на армијата.