Во скопската касарна „Илинден“ денеска се одржа централна свеченост за одбележување на тригодишнината од членството на Северна Македонија во НАТО – Алијансата.
На свеченоста се обратија претседателот на Владата Димитар Ковачевски, министерката за одбрана Славјанка Петровска и началникот на Генералштабот на Армијата на Република Северна Македонија генерал-потполковник Васко Ѓурчиновски.
„27-ми март е денот кога Северна Македонија ја запечати својата безбедносна иднина. Момент после кој нашата стабилност не може да биде доведена под прашалник од никој. И од таа точка можеме да чекориме само напред, силно и забрзано. Оваа годишнина не е само сеќавање на моментот кога македонското знаме се развиори пред седиштето на НАТО во Брисел, иако сум сигурен дека таа слика ќе остане трајно врежана во нашето сеќавање и секогаш ќе ни предизвикува вакви силни чувства на национална гордост. Тоа е момент во кој престанавме да бидеме точка на дневен ред на безбедноста, и станавме дел од масата која го создава дневниот ред за светската безбедност“, рече Ковачевски.
Со истото темпо, рече премиерот, државата ќе продолжи и на патот кон членство во Европската Унија. Тој во својот говор истакна дека „поразлична перспектива на тоа колку е важна безбедноста и стабилноста ни даде бруталната неиспровоцирана воена инвазија која Русија ја врши врз Украина“.
„Тоа е војна за каква мислевме дека европското тло нема повеќе да види. Наместо тоа, човечкото патење и ужасниот регрес на деструктивноста се повторува, и дополнително се трансформира во хибридна војна која користи сајбер и информациски оружја. Во оваа разорна војна, нашето место како и секогаш кога ќе се свртиме назад кон македонската историја, останува исто, а тоа е да се биде на вистинската страна на историјата. Уште на почетокот, минатата година го осудивме овој конфликт, ја поддржавме и ја поддржуваме Украина, за која во континуитет обезбедуваме помош“, изјави Ковачевски.
Според него, целта на поддршката не е да се продолжат воените дејствија, туку независна Украина да ја одбрани својата независност и територијален суверенитет и своите храбри луѓе.
Министерката за одбрана Славјанка Петровска во своето обраќање изрази благодарност до Армијата и во продолжение се осврна на воената брутална инвазијата која Русија ја врши врз Украина.
„Од првиот момент Северна Македонија беше јасна. Одлучно и цврсто стоиме на ставот – НЕ за војна, НЕ за страдања, НЕ за невини жртви. Донесовме одлуки за помош и поддршка на суверена земја која прави сè за да се одбрани од надворешна агресија, и тоа го направивме со разум и со цел да му помогнеме на народот кој сака само да биде свој на своето, да го заштити сопствениот суверенитет на кој има полно право”, рече Петровска.
Во однос на придонесот кон Армијата, таа рече дека „целта не била само да се внесе Армијата во НАТО, туку и НАТО во Армијата – „со опремата која се менува, со процедурите и процесите кои се развиваат, со кадарот кој се усовршува, со условите за работа и стандардот кој го има секој професионален војник, секој армиски подофицер и офицер“.
Началникот на Генералштабот на Армијата на Република Северна Македонија Васко Ѓурчиновски во своето обраќање нагласи дека со пристапот и исполнувањето на сите задачи во воениот дел, државата покажала дека е сигурен и одговорен партнер.
„Стандардите во обуката и интероперабилноста ги остваривме многу порано од нашето полноправно членство, а кое го потврдуваме и во изминатите три години. Со континуирана одлучност, тридецениска напорна работа и посветеност успеавме да ја оствариме и најбрзата воена интеграција во НАТО, цел која ја постигнавме за 19 месеци од нашето полноправно членство“, рече тој.
Ѓурчиновски во своето обраќање се осврна на успесите на Армијата:
„Успехот кој Армијата го достигна низ целиот овој период се огледа во она кое сега го имаме, а тоа се мобилни, професионални и ефикасни сили, способни да ја заштитат безбедноста на нашата земја и одговорат на сите современи закани и предизвици“.
