Владино-државни делегации, претставници од државни институции и организации, претставници од меѓународната заедница во земјава, денеска оддадоа почит кон загинатиот претседател на државата, Борис Трајковски. Со државнички церемонии беше одбележана 19 годишнината од авионската несреќа, во која животите ги загубија поранешниот претседател, Борис Трајковски, членови на неговиот кабинет и екипажот на авионот.
„Владата е определена кон прогресивни политики што ги водат граѓаните и државата напред, каква што беше и визијата на загинатиот претседател Борис Трајковски. Определбите за заедничко општество, во кое што граѓаните живеат и работат заедно, независно од нивните етнички, религиски или други определби, во мир и во меѓународно почитувана држава, интегрирана во демократските семејства на држави и народи, НАТО и Европската Унија, се пример за храбро и мудро лидерство засновано на вредности“, се вели во соопштението од Владата.
На неколку локации денеска беше положено цвеќе и беше изразена почит кон загинатиот претседател на државата – на неговото вечно почивалиште во Алејата на великаните во Бутел, пред споменикот во неговиот роден град, Струмица, како и на спомен обележјето на местото на авионската несреќа во Ротимље, близу Мостар, Босна и Херцеговина.
Цвеќе положија и оддадоа почит прво сопругата на загинатиот претседател Борис Трајковски, Вилма Трајковска, како и делегација од Кабинетот на претседателот на Северна Македонија, Стево Пендаровски, делегација од Собранието, делегација на Армијата, како и делегација од Сојузот на борци од НОАВМ.
